Gintuad sang Iloilo City Police Office (ICPO) nga nangin matalunsay ang dalagan sang Semana Santa sa syudad subong nga tuig.
Sa interview sang Bombo Radyo kay Police Colonel Kim Legada, Director sang Iloilo City Police Office, iya ginpahayag nga tubtob subong lamang nga adlaw ang deployment sang kapulisan apang, padayon ang pagbantay sa mga matawo nga lugar.
Suno kay Legada, kasunod sang Holy Week, tutokan subong sang talatapan ang mga nagabalik sa syudad agud nga mag-eskwela kag magtrabaho.
Nagpasalig man ang natungdan nga padayon ang monitoring sang kapulisan apisar pa nga indi holiday.
Nagpasalamat man si Legada sa mga pumuluyo kag katapo sang kapulisan nga walay-sapayan nga nagbulig agud mapabilin ang kalinong kag katawhay sa Semana Santa.
