Iloilo City – Ginatugyan sang pamunuan sang Iloilo City Police Office ang desisyon kay Iloilo City Mayor Jerry Treñas kun ihatag niya sang bilog ang reward money nga gintanyag sa makatudlo sa suspek sa robbery hold-up sa J&T Express sa Barangay Quintin Salas, Jaro, Iloilo City.
Sa interview sang Bombo Radyo kay Police Colonel Joeresty Coronica, officer-in-charge sang Iloilo City Police Office, iya ginpahayag nga nakadepende sa desisyon sang alkalde kun ihatag sini ang P100,000 nga reward money.
Suno kay Coronica, wala siya sang may nakita nga problema kun buhinan sang alkalde ang reward money matapos nga isa lang sa tatlo ka mga suspek ang nadakpan.
Ini amo si John Mark Lebuna, residente sang Barangay San Isidro, Jaro kag nadakpan sa Barangay Guinobatan, Leganes, Iloilo.
Sa subong, nagapadayon sa gihapon ang pagpangita sang mga pulisa sa iban pa nga mga suspek sa nasambit nga hold-up incident.
