ILOILO CITY – Handa ang Iloilo City Police Office (ICPO) nga ibalik ang salakyan nga ginhatag sang Iloilo City Government.
Ini ang may kaangtanan sa paandam ni Iloilo City Mayor-elect Jerry Treñas nga bawion ang tanan nga propidad nga ginpanagtag ni outgoing Iloilo City Mayor Jose Espinosa III bangud sa ginapahayag overpricing kag gingamit para sa personal nga interes.
Sa interview sang Bombo Radyo kay ICPO Director Police Col. Martin Defensor Jr., iya ginpahayag nga wala man sang problema kun ginapabalik ni Treñas ang mga propidad bangud nga ang Iloilo City Government man ang nagbakal sang salakyan.
Sa pagpaathag ni Defensor, normal lamang nga magpatigayon sang imbentaryo ang bag-o nga administrasyon kag prebelehiyo na para sa ICPO nga nahatagan sang bag-o nga salakyan.
Sa subong, hulaton na lang sang ICPO Director ang pinal nga desisyon ni Treñas kun bala permanente na nga bawion ang salakyan ukon igabalik pa sa ila.
