ILOILO CITY – Magapatigayon sang pagsinapol ang Iloilo City Police Office, bar owners kag si Iloilo City Mayor Jerry Treñas may kaangtanan sa pagdula sang Executive order 146 ukon ang Liquor ban sa syudad sang Iloilo.
Sa interview sang Bombo Radyo kay Iloilo City Police Office Director Police Col. Martin Defensor Jr., iya ginpahayag nga buwas nga adlaw, Hulyo 26, patigayunon sa Iloilo City Hall ang pagsinapol.
Suno kay Defensor, iya nga ginapaboran ang pahayag ni Mayor Treñas nga ang Philippine National Police ang magapanguna sa pagpatuman sang seguridad sa syudad sang Iloilo.
May kaangtanan sa Liquor Ban, ipausisa man ni Defensor ang ginapahayag indi pagresponde sang Mandurriao PNP sa kinagamo sa Smallville Complex sang nagligad nga Hunyo 20 sang kaagahon sa diin duha ka grupo ang nag-inaway kag may yara pa sang pagpangluthang nga natabo.
Samtang, ginpanginwala naman ni Police Major Marlon Valencia, hepe sang Mandurriao Police Station, nga wala nagresponde ang mga naka on-duty nga pulis.
Sa pagkamatuod suno kay Valencia, may yara man sang protocol nga ginasunod ang pulis sa pagresponde sa insidente.
Kadungan sini, ginpanginwala man sang hepe nga kilala sang mga pulis ang mga nagpanggamo rason nga wala nila gindakop.
