Liwat nga ginkilala bilang ‘Best City Police Office’ ang Iloilo City Police Office sa PNP DAY 2026 nga ginhiwat sa PNP Multi-Purpose Center sa Camp Crame, Quezon City.
Ini ang ikaduha nga sunod-sunod nga tuig nga nakuha sang ICPO ang nasambit nga award.
Personal ini nga ginbaton ni ICPO OIC Colonel Wilbert Parilla.
Sa mensahe ni PCol Parilla, iya ginapalab-ot ang pagpasalamat kay former ICPO Director PCol Legada, sa tanan nga ICPO personnel, sa supporta nga ginhatag sang Iloilo City Government, kag sa koordinasyon man sang mga Ilonggo.
Ini nga kadalag-an indi lang para sa ICPO kundi pati man sa bug-os nga syudad sang Iloilo.
Sa interview sang Bombo Radyo kay PMAJ. Shella Mae Sangrines, Spokesperson sang Iloilo City Police Station, iya ginpahayag nga ila gid nga ginakalipay ang nabatun nga award.
Suno man sa iya, ang mga sunod-sunod nga nabatun nila nga mga kadalag-an amo ang isa ka challenge para sa mga katapo sang kapulisan kag inspirasyon agud nga mas mangin maayo pagid ang ila nga performace.
