𝗜𝗟𝗢𝗜𝗟𝗢 𝗖𝗜𝗧𝗬 — Nagapatuman na sang case conference ang Iloilo City Police Office (ICPO) kaupod ang prosecutors kag Iloilo City Legal Office agud padalman ang kaso sang anay punong barangay nga gintiro-patay sa Brgy. Baldoza, Lapaz, Iloilo City.
Ang biktima amo si Ernie Poral, 65-anyos, residente sang Brgy. Ingore, Lapaz, Iloilo City.
Ang ginaalegar nga mga suspek amo sanday Nilo Guardaya, 39-anyos, kag Jerson Gentapao, 35-anyos, lunsay residente sang Igcocolo, Guimbal, Iloilo.
Sa interview sang Bombo Radyo kay Police Colonel Kim Legada, Director sang Iloilo City Police Office, iya ginpahayag nga naghatag na siya sang instructions sa mga operatiba sang talatapan agud nga magpangita sang dugang nga ebidensya batok sa suspek sang krimen.
Suno kay Legada, magapatuman man sila sang back tracking sa mga lugar nga posible ginkadtuan sang suspek antes kag matapos nga ginhimo ang krimen.
Gin-ako man sini nga indi pa gid makahatag sang kongkreto nga detalye ang ila talatapan sa kaso bangud wala pa napasaka ang kaso batok sa ginaalegar nga mga suspek nga nadakpan.
May yara naman sila sang eye witness nga saksi sa nagluntad nga insidente kag agud nga mas mapaathag ang motibo sa likod sang krimen.
Ginasundan man sang talatapan ang mga kuha sang closed circuit television (CCTV) sa pila ka mga establisyemento bangud dako ini nga bulig sa pagsolbar sang krimen.
Nahibaluan nga narekober sang kapulisan ang duha ka basiyo sang bala sa crime scene matapos nagluntad ang insidente.
Plano naman nga pasakaan sang kaso ang duha ka mga ginaalegar nga mga suspek subong nga adlaw.
