ILOILO CITY – Magahimo sang iban nga tikang ang Iloilo City Police Office agud nga masiguro nga hilway kag malinong ang Dinagyang 2020.
Sa interview sang Bombo Radyo kay Police Capt. Shella Mae Sangrines, Public Information Officer sang Iloilo City Police Office, iya ginpahayag nga bangud isa lang ka adlaw ang gin aprubahan sang Iloilo City Council nga signal interruption, magapatuman sang dugang nga pamaagi ang kapulisan agud masiguro nga wala sang dako nga insidente nga matabo kadungan sang kahiwatan.
Suno kay Sangrines, nag-request naman ang Iloilo City Police Office sang dugang nga 1,000 ka mga kapulisan sa Police Regional Office 6 bangud may yara lamang sang masobra 400 ka mga pulis ang ICPO.
Magluwas sa mga gin-request nga kapulisan, may yara man sang 2,000 ka mga force multipliers kag partner stakeholders sang Iloilo City Police Office nga maga-augment sa pagbantay sang syudad sang Iloilo kag maga standby man ang mga emergency groups.
Pahayag niya, dumilian sang kapulisan ang pagdala sang tanan nga sahi sang mataliwis nga butang; pagdala sang armas; pagbitbit sang ilimnon samtang nagalakat; pagdala sang sigarilyo kag pagbitbit sang backpack.
Panugyan ni Sangrines sa publiko, sundon kag hangpon sang maayo ang mga pagsulundan sang kapulisan agud nga mangin matawhay ang paghiwat kag pagselebrar sang Dinagyang Festival.
Katuyuan subong sang Iloilo City Police Office nga mangin zero-dinagyang related incident kag smoke free festival ang syudad sang Iloilo.
