ILOILO CITY – Compliant ang Iloilo City Police Office (ICPO) sa mandu ni Iloilo City Mayor Jerry Treñas nga dugangan pa ang police visibility agud malikawan ang pagluntad sang mga krimen partikular na ang pagpanghold-up sa syudad.
Sa interview sang Bombo Radyo kay Pol. Col. Eric Dampal, officer-in-charge sang ICPO, iya ginpahayag nga apisar wala pa sang mandu halin sa alkalde, madamo na sang nadeploy nga mga patrolmen sa syudad.
Ang mandu ni Treñas may kaangtanan sa police visibility kag mobile checkpoints ang kasunod sang natabo sa Barangay Dulunan, Arevalo, Iloilo City sang nagligad nga semana kun sa diin ginsulod sang duha ka mga kawatan ang apartment sang 39-anyos nga lalaki nga Chinese national.
Natigayon nga makuha sang mga suspek ang masobra P100,000 nga kwarta sang biktima, cellphone, kag L300 van nga gingamit sa pagpalagyo apang sang ulihi narecover ang van sang ginpatigayon ang hot pursuit operation.
Suno naman kay Dampal, masanag na subong ang imbestigasyon sa kaso bangud may yara na sang natipon nga mga ebidensya ang Arevalo Police Station kag may yara naman sang persons of interest nga wala lang anay ginpahingadlan sa publiko.
