ILOILO CITY–Indi gilayon magpati sa huring-huring ukon sa mga nagalapta nga balita sa social media kag mga text messages.
Ini ang panugyan sang Iloilo City Police Office (ICPO) tuhoy sa nagalapta nga text message kag balita sa social media tuhoy sa presensya sang Islamic State of Iraq and Syria (ISIS) sa syudad sang Iloilo.
Sa interview sang Bombo Radyo kay S/Insp Shella Mae Sangrines, tagpamaba sang ICPO, iya  ginpahayag nga madamu sang fake news nga ginapadala sa text messages kag social media sa subong nga tion ilabi pa nga may asud-asud nga  pagpamomba sa Mindanao.
Bangud sini, mas makapaayo suno kay Sangrines nga bag-o magpati sa  balita, hibaluon anay kun bala masaligan ang source ukon ang ginhalinan sang impormasyon.
Tuhoy naman sa mga nagalapta nga sala nga balita tuhoy sa posible pagpamomba sa syudad sang Iloilo, mas makapaayo suno kay Sangrines nga magpamangkot ukon magpati lamang sa official information nga naka-post sa social media sang Philippine National Police (PNP) ukon iban pa nga law enforcement agency.
Nahibalu-an nga gingamit pa sa pagpalapta sang sala nga impormasyon ang pangalan nga “Col. Malong” apang wala man ginhingadlan kun sin-o nga Col. Malong nga opisyal sang PNP ang ginatumod sang unknown sender.