ILOILO CITY – May yara na sang initial investigation ang Iloilo City Police Office may kaangtanan sa report tuhoy sa makaduluda nga mga indibidwal nga nagapanilag sa guwa sang mga jewelry store kag financial institution sa dalan Guanco sa City Proper.
Sa interview sang Bombo Radyo kay Police Lt. Col. Alexis Relado, Deputy City Director for Administration sang Iloilo City Police Office, iya ginpahayag nga sang iya nabaton ang mensahe ni Mayor Jerry Treñas, gilayon nga ginmandu ang deployment sang mga beat patrol.
Suno kay Relado, santo sa imbestigasyon, may nakita nga mga indibidwal nga nagapanilag sa guwa sang nasambit nga mga negosyo kun sa diin sila ang nakasuksok sang itom nga jacket.
Ginpahayag ni Relado nga indi lang makita ang kabug-usan nga guya sang mga ginakabig suspicious looking individual bangud sa ginapatuman nga mandatory wearing of face mask apang nakuha naman sang otoridad ang plate number sang salakyan sang nasambit nga mga indibidwal.
Ginpasalamatan man sang natungdan ang mga tag-iya sang nasambit nga mga negosyo bangud sa pagpalab-ot sang report kag mas makapaayo kun may yara sang Close Circuit Television kag naka-alerto sa tanan nga tion ang mga security guard agud nga indi masalisihan.
Agud nga matapna ang pagluntad sang ano man nga krimen, ginpahayag sang natungdan nga kinahanglan ang kooperasyon sang tanan.
