ICPO nabudlayan magtumod sa motibo sa pag-ambush sa pulis nga ginakabig high value target

ILOILO CITY – Gin-ako sang Iloilo City Police Office (ICPO) nga nabudlyan sila sa pagtumod sang motibo sa likod sang ginapahayag pag-ambush kay PO2 Dorben Acap Jr. kag pagkapilas ni PO2 Melvin Mocorro kasunod sang insidente sa Sitio Paho, Barangay Dulonan, Arevalo, Iloilo City.
Suno kay Senior Insp. Sheila Mae Acanto Sangrines, taghambal sang Iloilo City Police Office (ICPO), nagpatigayon sila sang case conference kahapon sa pagpanguna ni ICPO director S/Supt. Henry Biñas apang indi pa nila matumod kun sin-o sa duha ka mga pulis nga napilasan ang una nga nagpalupok.
Wala man sang witness nga manindugan suno kay Sangrines kag ang duha ka mga pilason nga mga pulis ang lunsay ginpaidalom sa operasyon gani limitado pa ang pahayag nga nakuha nila sa tagsa ka bahin.
Apisar sang mga nauna nga kuha sang CCTV footages kun sa diin nagaguwa nga gin-unahan luthang si Acap, luyag gihapon hibaluon sang ICPO ang matuod nga natabo santu sa pahayag sang mga nakakita sang insidente.
Nagalaum naman ang ICPO suno kay Sangrines nga may makuha na nga impormasyon sa duha ka pulis antes ang mga ini i-discharge sa mga ospital sa diin sila karon confined.
Ginpahayag dugang ni Snagrines nga may ibuyagyag si PO2 Dorben Acap Jr. tuhoy sa natabo nga pag-ambush sa iya.
Ini ang nangin panuaron ni Acap sang ulihi mapakig-angutan sang mga imbestigador angot sa insidente nga natabo sa Dulonan, Arevalo suno kay Sangrines.
Wala naman ni Acap gindetalye kun ano ang iya natalana nga ibuyagyag apang ini ang ginalauman magahatag sang kasanagan sa insidente.
Sa karon desidido si Acap suno kay Sangrines nga magpasaka sang nagakaigo nga panumbungon batok kay PO2 Melvin Mocorro nga amo naman ang ginatudlo sini nga nag-ambush sa iya.