ILOILO CITY- Naga-ugtas na ang Iloilo City Police Office sa mga pasaway nga pumuluyo nga wala nagasunod sa curfew kaangot sa Enhanced Community Quarantine.
Sa exclusive interview sang Bombo Radyo kay Police Capt. Shella Mae Sangrines, tagpamaba sang Iloilo City Police Office, iya ginpahayag nga istrikto nga ginapatuman ang curfew pagpatak sang 8:00 sa gab-i tubtub 5:00 sa kaagahon.
Suno kay Sangrines, sa subong, kapin 500 na ang kabug-usan nga numero sang mga nadakpan nga naglapas sa Executive Order No. 55 kag Executive Order No. 55-A series of 2020.
Ginpahayag ni Sangrines nga may mga ginpasakaan na sang kaso kag may iban man nga gintugyan sa ila barangay matapos ginpaandaman kag ginpaidalom sa lecture.
Ginpahangop sang natungdan nga indi niya luyag mabutang sa kompromiso ang seguridad sang mga pumuluyo sa halit nga dala sang Coronavirus Disease 2019 (COVID-19).
Nagpanawagan man si Sangrines nga kun tani hangpon man sang mga pumuluyo ang ginahimo nga sakripisyo sang frontliners.
Nahibaluan nga kadungan sang curfew, nagapatigayon sang rekorida ang mga patrol sang tagsa ka mga istasyon sa Iloilo City Police Office
