ILOILO CITY – Hugot nga ginabaton ni Iloilo City Police Office (ICPO) Director Police Col. Martin Defensor Jr. ang pagbasura sang Iloilo City Council sa iya hingyo nga ideklarar nga persona non grata ang mga miyembro sang Communist Party of the Philippines- New People’s Army (CPP-NPA).
Sa interview sang Bombo Radyo kay Defensor, iya ginpahayag nga wala na siya sang may mahimo pa bangud nga ginkasugtan sang konseho nga indi pagpaboran ang iya hingyo.
Sa pagpaathag ni Defensor, ang pagdeklarar sa CPP-NPA nga persona non grata ang nagakahulugan nga wala gina abi-abi kag ginapakamala-ot sang syudad sang Iloilo ang mga rebelde nga grupo nga nagapatigayon sang kalakasan sa masobra 50 ka tuig.
Ginatan-aw man ni Defensor nga isa sa mga rason kun nga-a wala ginpaboran sang konseho ang iya proposal amo nga may yara sila sang indi pag-intindihanay ni Iloilo City Coucnilor Plaridel Nava, nga amo ang majority floor leader sa konseho.
Suno sa ICPO Director, kun ano man ang indi nila pag-intindihanay ni Nava, wala ini sang mayor nga epekto sa iya ginduso nga proposal.
Sa pihak sini, ginpahayag sang natungdan nga liwat siya nga magapadala sang sulat sa tion nga ang bag-o nga set sang elected officials ang magabulos sa konseho.
