ILOILO CITY — Nagaprepar na ang Iloilo City Police Office sa palaabuton nga 132 ka mga police personnel nga idesignar sa dugang nga apat ka mga police stations sa Iloilo City.
Sa interview sang Bombo Radyo kay Police Major Shella Mae Sangrines, spokesperson sang ICPO, iya ginpahayag nga lapit na lang mahuman ang police station 7 kag police station 8 agud pahamtangan man sang mga gin-download nga kapulisan halin sa Police Regional Office 6 (PRO6).
Suno kay Sangrines, ginapangunahan ni City Director Police Colonel Joeresty Coronica ang pag-supervise sa mga katapo sang pulis agud maplastar sang maayo kag mangin matalunsay ang pagsulod sang mga na-designar nga mga kapulisan.
Ginpahayag man sini nga kinahanglanon gid sang ICPO nga madugangan ang pwersa sang ila katapo sa syudad, sa diin, madugay na nga ginatinguhaan man nga madugangan ang mga police stations.
Nahibaluan nga ang police station 7 ang ipahamtang sa Tanza Esperenza, City Proper; ang police station 8 naman ang ibutang sa Distrito sang Mandurriao; ang police station 9 ang yara sa Brgy. Bo. Obrero, Lapuz; samtang ang police station 10 naman ang ibutang sa Distrito sang Jaro.
