Nagasaylo-saylo lang sang banwa ang isa ka babayi nga ginbansagan sang Iloilo City Police Office nga “ATM Queen” kag ulihi nga nakapang-biktima sa isa ka mall sa Molo, Iloilo City.
Ang identified nga suspek amo si Lunalyn De Pedro, 40, nga ang ulihi na-tumod nga address amo ang Brgy. Gustilo, Lapaz, Iloilo City.
Sa latest report sang ICPO, ginpahayag nga ang pinakaulihi nga reported nga biktima ni De Pedro amo ang 62-anyos nga tigulang nga babayi nga nag-withdraw sa Automated Teller Machine (ATM) sa GT Mall sa Molo sang nagligad nga Pebrero 25.
Sa interview sang Bombo Radyo kay Police Major Shella Mae Sangrines, spokesperson sang ICPO, iya ginpahayag nga nagpakuno-kuno pa ang suspek nga isa ka maayo nga tawo nga makabulig sa tigulang tubtub nga nataban sini ang P130,000.
Sandig sa police records, may 13 na ka kaso si De Pedro nga Theft, Malicious Mischief, Swindling (Estafa) kag paglapas sa Access Device Regulation Act of 1998 ukon Credit Card Violation Act.
Nakomiter ini nga mga krimen sa syudad sang Iloilo, sa Sara, Iloilo, Bacolod City, kag sa Lipa City, Batangas.
Ginpahayag ni Sangrines nga indi na bag-uhan sa presuhan ang suspek apang naka-guwa bangud sa pyansa. Ginpaguwa sang pulis ang picture sang suspek kag gin-abisuhan ang publiko nga i-report sa otoridad kun makit-an agud gilayon nga maaresto. ##
