ILOILO CITY – Nagpaandam ang kapulisan sa syudad nga pasakaan nila sang kaso ang sin-o man nga magtuga sang gamo sa mga activities sang Dinagyang Festival.
Sa interview sang Bombo Radyo kay Police Lieutenant Colonel Rene Obregon, Jr., deputy director for operations sang Iloilo City Police Office, iya ginpahayag nga ini ang mandu sa ila ni Iloilo City Police Office Director Police Colonel Leo Batiles.
Nagpasalig man ini nga may yara sang pulis sa tagsa ka bahin sang venue sang Dinagyang Festival.
Samtang, indi pagpahanugutan ang pagdala sang mga blunt ukon deadly weapons.
Indi man pagpahanugutan ang pagsuksok sang paha ilabi na ang may dalagko nga buckle.
Katuyuan sini nga malikawan ang paggamit sang paha sa posible kinagamo nga matabo.
Ini ang mahimo nga ma-deposit sa mga pulis kag force multiipliers nga nagabantay sa entrance sang venue.
Pahanugutan ang pagdala sang back pack apang kinahanglan nga ipaidalom sa frisking.
Nagpanugyan naman ang kapulisan nga kun mahimo, ang mga basic necessities lamang ang dal-on.
