Nagpaathag ang pamunuan sang Iloilo City Police Office (ICPO) angot sa travel protocol nga ginapatuman sa kada border control point sa syudad sang Iloilo.
Ini ang kasunod sang pagwangal sang pila ka pumuluyo matapos gintunaan sang malawig nga trapiko ang ma-id-id nga pagtsikyar sang mga travel pass ukon dokumento sa kada indibidwal nga nagapadulong sa syudad.
Sa interview sang Bombo Radyo kay ICPO Director Police Colonel Uldarico Garbanzos, iya ginpahayag nga sa una nga adlaw sang liwat nga pagpatuman sang border control, madamo sila sang mga ginpabalik nga indibidwal bangud indi man essential ang katuyuan sang pagpadulong sa syudad.
Madamo man suno kay Garbanzos ang mga wala sang dala nga valid documents kaangay sang company ID, certificate of employment kag travel pass.
May mga dungol man suno sa pulis nga naga-insister sa pagpadulong sa syudad apisar indi sila makabig nga Authorized Persons Outside Residence (APORs).
Nahibaluan nga subong nga adlaw, kada Huwebes, untaton sang Iloilo City ang pagpatigayon sang border control agud maghatag ligwa sa mga maga-avail sang libre nga COVID-19 vaccination sa syudad.
