Nagpanugyan ang Iloilo City Police Office (ICPO) sa publiko nga mangin ‘security conscious’ subong nga holiday season.
Sa interview sang Bombo Radyo kay Police Major Shella Mae Sangrines, Spokesperson sang Iloilo City Police Office, iya ginpahayag nga bisan diin nga lugar nagapadulong, mangin observant, alerto, kag security conscious sa palibot.
Suno kay Sangrines, likawan ang mga madulom nga lugar bangud ini ang masami man ginaluntaran sang indi manami nga hitabo lakip na ang pagpangawat kag pagpangbastos.
Gin-enganyo man sini ang motorista nga likawan anay ang pag-park sa mga madulom nga lugar agud nga makapalayo sa basag kotse gang.
Nagpatuman naman sang adjustment sa deployment ang talatapan sa pila ka lugar sa syudad agud nga mapasangkad ang pagpatrolya subong nga Christmas season.
