Iloilo City- Nagpatigayon sang consultative meeting ang Iloilo City Police Office sa mga resto bar managers, security officers kag bouncers agud malikawan ang insidente sang kinagamo sa syudad sang Iloilo.
Ini matapos marekord ang duha ka mga kaso sang kinagamo sa kada bulan sa syudad.
Nagtambong sa amo nga pagsinapol amo sanday Police Colonel Joeresty Coronica, director sang Iloilo City Police Office, Mr. Nestor Canong, pinuno sang Iloilo City Compliance Team, Police Lieutenant Colonel Rolando Mapile, Police Lieutenant Colonel Albert Sy, hepe sang Mandurriao Police Station, kag mga katapo sang Iloilo Bars Operators Association.
Sa interview sang Bombo Radyo kay Police Major Shella Mae Sangrines, spokesperson sang Iloilo City Police Office, iya ginapahayag nga nagpirma ang mga nagadumala sang establisyemento sang Affidavit of Undertaking agud magbulig nga mahilway sa kinagamo ang syudad.
Suno kay Sangrines, nagpasiguro ang Iloilo Bars Operators Association nga magapaidalom sang nagakaigo nga trainig ang mga security officers agud mangin aligmat sa tanan nga tion.
Nahibaluan nga gindiskusyunan man sa pagsinapol ang crime statistics, crime situation updates, kag mga security measures nga ipatuman sa distrito sang Mandurriao.
