ILOILO CITY – Pito pa lang ka reklamo ang nabaton sang Iloilo City Police Office may kaangtanan sa Social Amelioration Program.
Sa interview sang Bombo Radyo kay Police Captain Shella Mae Sangrines, tagpamaba sang Iloilo City Police Office, iya ginpahayag nga as of May 17, may yara sang tag isa ka reklamo gikan sa City Proper, La Paz kag Arevalo samtang may tag duha naman ka reklamo gikan sa Jaro kag Molo.
Suno kay Sangrines, sa pito ka reklamo, isa pa lang diri ang napasa sa Criminal Investigation and Detection Group para sa validation.
Ginpahayag ni Sangrines nga bukas ang hotline sang Iloilo City Police Office kag sang tanan nga Police Station sa syudad para sa reklamo tuhoy sa Social Amelioration Program.
Ang problema lang suno sa natungdan amo nga kalabanan sa mga tagreklamo ang wala sang kaisog nga magpanindugan agud nga mapadayon ang kaso.
Ang hotline numbers sang Iloilo City Police Office para sa mga may reklamo sa Social Amelioration Program amo ang 09610517867 kag 09153022551.
