ILOILO CITY – Padayon pa nga gina-imbestigaran sang Iloilo City Police Office ang natabo nga pagpangtiro sa apat ka mga salakyan sa Barangay Monica Bluementritt, Iloilo City Proper.
Ang nasambit nga mga salakyan ang naka-park sa sulod sang covered gym.
Ang mga ini ang ginapanag-iyahan nanday Prosecutor Ma. Monica Espinosa, Fillmore Espinosa, kag Lovely Obligacion.
Ang Black Chevrolet Sedan ang ginapanag-iyahan ni Prosecutor Espinosa apang ginagamit sang iya utod nga si Freddy Espinosa Jr..
Ang Montero Sports kag Honda CRV ang ginapanag-iyahan naman ni Filmore.
Ginapanag-iyahan naman ni Obligacion ang Toyota Rush.
Maswerte nga wala naman sang may napilasan sa insidente.
Sa interview sang Bombo Radyo kay Police Colonel Leo Batiles, director sang Iloilo City Police Office, iya ginpahayag nga ginahibalo nila kun may yara sang nakakita sa natabo.
May yara sang closed circuit television sa sulod sang gym apang wala naga-function.
Sa imbestigasyon sang kapulisan, posible isa lang ang suspek sa amo nga insidente.
Ginalantaw man ang tanan nga anggulo sa amo nga pagpaniro.
Sa subong, wala man sang may nabaton nga pamahog ang pamilya Espinosa.
