Gin-athag sang Iloilo City Police Office (ICPO) nga may ara sang exemption ang pagdumili sa publiko sa pag-inum-inum sa higad sang dalan sa tion sang fiesta kag iban pa nga aktibidad sa mga barangay
Ini nahanungod sa ginpaguwa nga direktiba sang Department of Interior and Local Government (DILG) nahanungod sa mga nasambit nga lokal nga ordinansa.
Sa interview sang Bombo Radyo kay PCol. Wilbert Parilla, director sang ICPO, iya ginpahayag nga kinahanglan sang publiko mag-proseso sang permit ukon mag-request sang clearance gikan sa opisina sang ICPO kag sa Traffic and Transportation Management Office (TTMO) agud nga matugutan ang mga ini nga mag-inum inum sa higad sang dalan sa tion sang aktibidad.
Suno kay PCol. Parilla nga madugay na nga daan gina-implementar sa syudad sang Iloilo ang mga lokal nga ordinansa nga ginpagwa sang DILG apang mas mangin istrikto sa subong ang mga kapulisan sa pag-monitor kag pagpatuman sang mga layi.
Pahayag pa niya, naghatag naman ini sang mandu sa mga station commanders sa pulo ka police station sa syudad agud nga mag-coordinate sa mga barangay agud nga mas ma-implementar sang maayo ang mga nasambit nga mga ordinansa.
Dugang pa ni PCol. Parilla, paagi sa mga layi pareho sang pagdumili sang pag-inom sang makahulubog nga ilimnon sa kilid sang kalsada kag ang pagpatuman sang curfew sa mga menor de edad halin alas-10 sang gab-i tubtob alas-4 sang kaagahon ang makabulig agud mapanubo ang mga krimen kag kinagamo sa syudad.
