Regular nga ginapatuman sang Iloilo City Police Office ang pila ka mga mental health programs para sa tanan nga mga police personnel.
Sa interview sang Bombo Radyo kay Police Colonel Kim Legada, City Director sang ICPO, iya ginpahayag nga may regular nga medical officer sang Regional Medical and Dental Unit sang Police Regional Office 6 ang nagalibot sa kada istasyon diri sa probinsya kag siyudad sang Iloilo agud mag-check sang mga ikaayong lawas sang kapulisan.
Suno kay Legada, gina-monitor man diri kun sin-o ang makitaan sang mga senyales; kag kun may yara, gina-istorya kag gina-refer sa PRO 6 agud madapatan sang nagakaigo nga pagbulong sang ila nga psychologist.
Nagpalab-ot man sang mensahe si Legada sa mga kapulisan nga kun may problema, yara ang opisina sang City Director nga bukas kag nakahanda nga magbulig sa ila.
