ILOILO CITY – Suportado sang Iloilo City Police Office (ICPO) ang ginaduso nga pagdula sang Executive Order 146 ukon ang Liquor Ban sa syudad sang Iloilo.
Ini ang kasunod sang ginpatigayon nga pagsinapol sang ICPO kaupod si Iloilo City Councilor Jojo Javellana nga chairman sang Committee on Police Maters sa konseho.
Sa interview sang Bombo Radyo kay Police Captain Shella Mae Sangrines, tagpamaba sang ICPO, iya ginpahayag nga pabor sila nga dula-on ang EO 146 apang may yara lang sang pila ka kondisyon.
Lakip diri suno kay Sangrines amo ang pagpahamtang sang functional nga Closed Circuit Television (CCTV) camera sa tagsa ka commercial establishment, pagpahamtang sang security guards ukon bouncer kag ang maayo nga koordinasyon sang tagsa ka tagdumalahan sang commercial establishment kag sang ICPO.
Ang mga nasambit nga kondisyon suno kay Snagrines ang makabulig agud nga malikawan ang mga kinagamo kadungan sang pagdula sang Liquor Ban.
Samtang, magluwas sa EO146, ginpahayag ni Sangrines nga gin-istoryahan man sa pagsinapol ang pila ka mga police concern.
Ginpahayag ni Sangrines nga lakip na diri amo ang pagpakaayo sang street light sa mga dalan nga tuman ka dulom kag nagahingyo man ang ICPO sang police motorcycle agud nga magamit ilabi kun may yara sang police operations.
Magluwas diri, gin-istoryahan man nga dapat suportahan sang Iloilo City Government ang mga proyekto sang ICPO agud nga matapna na ang pagliho-liho sang mga kabataan ilabi na ang mga nagalapas sa curfew for minors.
