Tinguhaan gihapon sang Iloilo City Police Office ukon ICPO nga mapabilin ang peace and order sa pagahiwaton nga Dinagyang Festival 2026.
Ini apisar nga wala gin-aprubahan ni Mayor Raisa Treñas ang pagpatigayon sang signal jamming sa mga lugar nga patigayunan sang mga aktibidades sa highlights sa Enero 24 tubtub 25.
Sa interview sang Bombo Radyo kay Police Major Sheila Mae Sangrines, spokesperson sang ICPO, iya ginpahayag nga ginarespeto sang kapulisan ang desisyon sang city government.
Suno sa iya, kun wala man sang signal jamming, wala ini makapabag-o sa kahandaan nga ila ginpreparar, kaangay sang ila security plan nga ila man ginpatigayon sang nagligad nga tuig.
Gin-athag pa ni Sangrines nga ila tinguhaan kag ikonsiderar ang mga security measures nga ipatuman, lakip na ang pagpabaskog sang intelligence monitoring kag mas hugot nga pagbantay sa mga lugar nga madamo sang tawo.
Suno kay Sangrines, 100% ang mga kapulisan nga handa magserbisyo sa pumuluyo kag mga bisita nga maga-upod sa selebrasyon sang Dinagyang, agud masiguro ang kaluwasan sang tanan nga Ilonggo.
