Wala nagauntat ang Iloilo City Police Office (ICPO) sa pagsolbar sang kaso sa kontrobersyal nga pagluthang-patay sa 19-anyos nga anak ni Leganes Sangguniang Bayan (SB) Member Larry Labuson sa Metropolis Avenue, Jaro, Iloilo City.
Ang biktima nga si Carl Dominic Labuson, 19, sang Carimayor, Leganes Iloilo.
Ini ang nakaangkon sang pilas sa dughan kag ulo nga gintunaan sang iya kamatayon.
Sa interview sang Bombo Radyo kay ICPO Director PCol. Uldarico Garbanzos, iya ginpahayag nga padayon ang pagbuligay nila sang mga imbestigador natuhoy insidente nga nag-ugat sa frustrated robbery sa diin nangin witness ang biktima.
Suno kay Garbanzos, nagmando man sa ila si Iloilo City Mayor Jerry Treñas nga solbaron gid ang mga kaso sang shooting incident.
Pahayag sang pulis, sa subong padayon nila nga ginasundan kag ginaverify ang mga kuha sang close circuit television (CCTV) footage malapit sa ginlutaran sang insidente agud imbestigaran sang maid-id ang natabo nga krimen.
Nagpanawagan man ang mga pulis sa publiko nga magkooperar kun may nahibaluan may kaangtanan sa identity sang suspek.
Nahibaluan nga ginkumpirmar ni SB member Labuson nga nagpakig-angot na ang iya pamilya sa National Bureau of Investigation (NBI) agud magpabulig sa imbestigasyon sang kaso sang pagkamatay sang iya anak.
Magahatag man sang P100, 000 nga reward money ang pamilya Labuson sa makatudlo sa suspek sang krimen.
