𝗜𝗟𝗢𝗜𝗟𝗢 𝗖𝗜𝗧𝗬— Nagpaathag ang Iloilo City Police Station 1 kon ngaa wala gilayon nadakpan ang suspek nga si Nilo Guardaya nga nagluthang-patay kay Reniel Lazaro sa Villa, Anita, Iloilo City Proper sang Marso 17, 2024 nga amo man ang ginatudlo nagpatay kay Ex punong barangay Ernie Poral.
Kun balikan, nagapungko lang sa guwa sang tiyangge si Lazaro apang hinali nga may nag-abot nga tawo kag ginluthang siya sa dughan, idalom nga porsyon sang likod, kag sa likod sang iya paa.
Gilayon nga nagpalagyo ang suspek nga sang amo nga tion nagasuksok sang jacket, naka-bonnet, kag may face mask nga green.
Sa pagpatay naman kay Poral sang nagligad nga adlaw, naka-helmet ang suspek apang pagkagab-i, gindakop si Nilo Guardaya, 39, sa Barangay Girado‑Magsaysay, Guimbal kag amo ang gindeklarar sang kapulisan nga suspek sa krimen.
Sa interview sang Bombo Radyo kay Police Captain Roque Gimeno III, hepe sang Iloilo City Police Station 1, iya ginpahayag nga ang rason kon ngaa wala gilayon nadakop ang suspek amo bangud nahadlok ang pamilya sang biktima nga magpanugid sa kapulisan ilabi na nga nakit-an pa ang presensya ni Guardaya sa lugar matapos ang insidente.
Suno kay Gimeno, kasunod sang krimen, gilayon nga nagpatuman ang ila talatapan sang back tracking agud matumod ang suspek kag kon sa diin ini nagpadulong.
Ginpahayag man ni Gimeno nga didto kag nahibaluan nga may look out nga kaupod ang suspek nga nagapatuman sang casing surveillance sa mga target sini nga patyon.
Una na nga nagpanindugan ang iloy ni Lazaro nga si Nilo Guardaya nga amo ang ginapahayag nagpatay sa anay punong barangay sang Ingore, Lapaz ang isa lang sa nagluthang-patay sa iya nga anak.
Hugot naman nga nagapati ang otoridad nga dako ini nga ebidensya agud matumod nga si Guardaya mismo ang nagpatay kay Lazaro.
