Nagpaathag ang Iloilo City Police Station 10 sa publiko nga wala sang bomba sa Festive Walk sa Mandurriao, Iloilo City kasunod sang “bomb threat” nga nabaton sang mall.
Sa interview sang Bombo Radyo kay Police Captain Val Cambel, hepe sang Iloilo City Police Station 10, iya ginpahayag nga nakabaton ang talatapan sang impormasyon nga may threat halin sa opisina sang Metro Pacific Iloilo Water nga nakahamtang sa Mega World sa Festive Walk Iloilo.
Suno kay Cambel, gilayon sila nga nagkoordinar sa nasambit nga talatapan kag sa Explosive Ordinance Disposal ( EOD ) agud nga respondehan kag magpatuman sang paneling operation sa lugar.
Gin-athag man sini nga nabaton ang bomb threat sang Metro Pacific Iloilo Water paagi sa mensahe halin sa ila nga facebook messenger.
Negatibo naman sa bomba ang lugar matapos nga ginlibot kag ginsekyar sang otoridad.
