Ginasundan na sang Iloilo City Police Station 3 ang mga CCTV sa nagluntad nga motornapping incident sang Pebrero 11 sa bahin sang Quintin Salas sa Distrito sang Jaro.
Sa interview sang Bombo Radyo kay PCPT. Mavin Laraño, hepe sang ICPS 3, iya ginpahayag nga ginalantaw nga pareho lang ang suspek sang motornapping incident sang Pebrero 11 kag sang Pebrero 3 sa atubang sang Land Transporation Office sa bahin man sang Quintin Salas.
Ini matapos nga nakit-an sa CCTV footages nga pareho ang panglawasun sang suspek sang duha ka insidente.
Suno pa kay Laraño, padayon ang ila nga imbestigasyon agud nga mahibaluan kun isa lang ang persona sa likod sang motornapping.
Nagpahanumdom man ini sa publiko nga isekyar ang ila nga mga propiedad ilabi na ang motorsiklo agud malikawan ang kaangay nga mga insidente.
Nahibaluan nga ini na ang ikalima nga insidente sang motornapping nga narekord sa syudad subong nga tuig.
