𝗜𝗟𝗢𝗜𝗟𝗢 𝗖𝗜𝗧𝗬 —Ginpaathag sang Iloilo City Police Station 3 (ICPS3) nga wala sang nagapang-kidnap sa distrito sang Jaro baliskad sa mga nagalapta nga impormasyon.
Sa interview sang Bombo Radyo kay Police Captain Melchor Tolentino, hepe sang Iloilo City Police Station 3, iya ginpahayag nga sa pagpadulong sang ila katapo sa Brgy, San Isidro, Jaro, ila nakipag-angotan ang barangay officials sang lugar kag natumod nga wala sang ano man nga record sang insidente nga may nadula nga kabataan bangud sa kidnapping.
Suno kay Tolentino, wala man sang ano nga blotter sa ila talatapan natuhoy sa amo nga insidente kag santo sa ginpatuman nila nga verification sa nasambit nga lugar.
Ginpahayag man sini nga tutokan sang kapulisan ang sin-o man nga nagapalapta sang peke nga mensahe agud nga indi na makatuga pa sang kakugmat sa mga residente.
Nagpanugyan naman ang natungdan sa mga pumuluyo nga untatan na ang pagpasa sang makahalalit nga impormasyon bangud wala ini sang may maidulot nga manami ilabi na sa peace and order sang lugar.
