Nagapabilin nga wala sa gihapon matumod sang Iloilo City Police Station 5 ang mga suspek sang ‘basag kotse’ nga nangbiktima sang isa ka SUV sa Mandurriao.
Sa interview sang Bombo Radyo kay PCapt. Joebert Amado, Officer in Charge sang Iloilo City Police Station 5, iya ginpahayag nga natabo ang insidente sa isa ka parking area sa nasambit nga Distrito.
Suno kay Amado, magapamasahe lang kontani ang mag-asawa nga biktima antes nagluntad ang pagpangwasak sang ila salakyan.
Matapos ang 30 minutos nga pagpamasahe sang mag-asawa, ginkakibot lang nila nga buka na ang wind shield sang passenger side sang salakyan.
Didto man ka natukiban nila nga wala na ang bag sang asawa nga nagaunod sang assorted ID’s kag cash nga P14,000.
Nagaguwa naman sang closed circuit television (CCTV) nga ang nagatambay nga isa ka motorsiklo malapit sa parking lot ang posible mga suspek sa insidente.
Ginalantaw man sang talatapan nga mahimo indi magnubo sa duha ang mga suspek kag ang yara sa motorsiklo ang mahimo nagserbe nga lookout.
Natukiban nga ginbilin sang mga suspek ang mga IDs sang biktima nga nakasulod sa plastic sa Distrito sang Jaro.
