ILOILO CITY — Handa na nga ipatuman buwas nga adlaw sang Iloilo City Traffic Management Unit (ICTMU) ang enhanced Local Public Transport Route Plan (LPTRP) sa Iloilo City.
Ini kasunod man sang pagkapaslaw sang ginhatag nga leeway para sa mga unconsolidated public utility vehicles (PUV).
Sa interview sang Bombo Radyo kay Ret. Police Colonel Uldarico Garbanzos, pinuno sang ICTMU, iya ginpahayag nga magatipon sila sang Land Transportation Franchising and Regulatory Board (LTFRB), Land Transportation Office (LTO), kag Iloilo City police personnel sa Jaro Plaza agud magpatuman sang enforcement kag press briefing.
Suno kay Garbanzos, ang enforcement sang mga nagkalain-lain nga ahensya ang magaduso sang implementasyon sang enhanced Local Public Transport Route Plan agud mangin matalaunsay ang pagpatuman sang amo nga tikang.
Ginpahayag man sini nga ang target sang enforcement amo ang mangdakop sang mga nagabyahe nga traditional jeepneys nga wala sang sticker, nga nagakahulugan nga indi consolidated kag ginakabig nga isa ka colorum.
Nagpangabay naman ang natungdan sa mga colorum nga tricycle sa syudad nga mag-apply na sa 31 ka mga route plan agud indi na madakop kag mamultahan pa.
Nagpangayo naman ini sang kooperasyon kag pag-intindi sa mga motorista agud mangin tayuyon man ang pag-implementar sang bag-o nga transport scheme sa Iloilo City.
