𝗟𝗔𝗣𝗨𝗭, 𝗜𝗟𝗢𝗜𝗟𝗢 𝗖𝗜𝗧𝗬 — Nagpaandam ang Iloilo City Traffic Management Unit (ICTMU) sa mga trailer truck nga iligal nga naga-on road parking sa dalan Brgy. Loboc kag Mansaya, Lapuz, Iloilo City.
Sa interview sang Bombo Radyo kay Ret. Police Colonel Uldarico Garbanzos, Head sang Iloilo City Traffic Management Unit, iya ginpahayag nga nagsulat ang ila talatapan sa Department of Public Works and Highways (DPWH) kag Land Transportation Office (LTO), Iloilo City Police Office (ICPO), kag sa highway patrol agud mangayo sang bulig bangud sa nagabalik-balik nga mga trailer truck.
Suno kay Garbanzos, gilayon man nga nagpatrol sa lugar ang mga nasambit nga talatapan agud nga sekyaron ang sitwasyon sang dalan kag mahatagan sang leksyon ang mga trailer truck.
Ginrason naman sang mga operators sang trailer truck nga may mga scenario nga nagahulat sila sang ila oras agud nga maka-unload sang ila dala sa bodega, rason man nga nagadugayan sila nga magpark sa amo nga dalan.
Nakasaad naman sa sulat nga ginpadara sang Iloilo City Traffic Management Unit sa operators sang trailer truck nga ‘indi anay magpark’ samtang wala pa ang ila oras agud nga mag-unload sang dala bangud nagatuga sang huol sa mga motorista.
Nahibaluan nga anay naman nga nagpalab-ot ang mga barangay officials sang nasambit nga lugar sa Iloilo City Traffic Management Unit agud nga tutokan ang mga trailer truck nga iligal nga naga-park sa dalan.
Makaligad ang pila ka semana, naghawan ang dalan apang liwat na naman nga nagabalik sila parking ilabi na kon kagab-ihon.
Nagpasalig naman ang talatapan nga liwat nga magsulat agud nga pormal nga masabat sang operators sang trailer truck ang ginareklamo nga mga naka-park nga container sang truck.
