Nagpaathag ang Iloilo City Traffic Management Unit (ICTMU) sa nagluntad nga traffic kaina sang aga bangud man sa ginpatigayon nga road closure para sa Milo Marathon 2024.
Sa interview sang Bombo Radyo kay Ret. Police Major Uldarico Garbanzos, Head sang Iloilo City Traffic Management Unit, iya ginpahayag nga antes paman sila nagdesisyon nga magbutang sang mga road closure sa pila ka dalan, may mga several meeting sila nga ginpatigayon agud nga masigurado nga mangin matalonsay ang dalagan sang trapiko apisar sang aktibidad.
Suno kay Garbanzos, may gindugang sila nga mga green guards sa pila ka areas agud nga indi lang ang traffic personnel ang maga-manage sa dalagan sang trapiko.
Ginpahayag man sang natungdan nga may mga gindesignar nga mga personnel ang organizer sang kahiwatan agud nga matutukan ang public safety.
Gin-athag man sini nga may yara sang kabug-usan nga 132 ka mga traffic personnel ang talatapan nga gin-augment sa tanan nga ruta nga maagyan sang marathon.
Ginakabig man ni Garbanzos nga generally peaceful kag successful ang kabug-usan nga Milo Marathon.
