ILOILO CITY — Nagpaathag ang Iloilo City Traffic Management Unit (ICTMU) tuhoy sa sistema sang Enhanced Local Public Transport Route Plan (LPTRP) sang pagpasulod sang 40% ka mga consolidated units halin sa first town municipalities sang probinsya sang Iloilo.
Sa interview sang Bombo Radyo kay Ret. Police Colonel Uldarico Garbanzos, pinuno sang nasambit nga talatapan, iya ginpahayag nga ang 25% sa kabug-usan sang 40% amo ang number of units nga maka-akomodar sang mga pasahero, samtang ang 15% naman ang magaserbe nga buffer units ilabi na kun rush hour.
Suno kay Garbanzos, flexible and controlled ang pagpasulod sa 40% sang mga consolidated units halin sa probinsya sa diin sa kada rush hour, may ipaguwa nga units agud indi ma-stranded ang mga pasahero nga naghalin sa first town nga nagapasulod sa Iloilo City.
Ginpahayag man sini nga ginakonsiderar sa implementasyon sang amo nga tikang ang mga transport alliance kag city loop, bangud kun gilayon nga pasudlon ang mga ini, posible makatuga sang kompetisyon.
Nahibaluan nga subong nga adlaw nangin epektibo ang pagpasulod sang 40% ka mga consolidated units halin sa probinsya sang Iloilo.
Ini kasunod man sang pag-apruba ni Iloilo City Mayor Jerry Treñas sang sulat ni Iloilo Governor Arthur Defensor Jr. nga nagahingyo nga pahanugutan nga makasulod ang mga units halin sa first town municipalities.
Nagpamatok naman ang pila ka operators kag drivers sang mga consolidated units sang probinsya sa implementasyon sang Enhance Local Public Transport Route Plan (LPTRP).
Sa interview sang Bombo Radyo kay Albert Salalema, isa ka operator, iya ginpahayag nga daw kaangay lang nga ginahimo sila sang Iloilo City Government nga sunod-sunoran bangud sa kada sa pagpasulod sang 15% nga units sa nakatalana nga oras, may pasahero man ukon wala, indi na liwat pa makasulod ukon makabalik sa syudad.
Suno kay Salalema, daw pareho lang nga nangin panakip butas sila sang higko sang syudad bangud sa ginaduso nga sistema.
Ginpahayag man sini nga ang buffer nga sistema ang indi makabayad sang ila ginagasto sa boundary sang unit, gatong, kag parking fee.
Nagpanindugan man ang natungdan nga makatuga lang sa pagkaperde sang palangabuhian nila nga implementasyon sang Enhance Local Public Transport Route Plan.
Ginpakamalut naman sang isa ka operator ang mga tikang nga gintanyag sa ila kasunod man sang pag-implementar sang bag-o nga ruta.
Sa interview sang Bombo Radyo kay Victoria Giso, isa ka operator, iya ginpahayag nga dapat ikonsidera man sang syudad ang ila palangabuhian bangud tama ka bug-at ang sistema nga ila ginaduso.
Suno kay Giso, sa lima ka adlaw nga ginhatag sang Land Transportation Franchising and Regulatory Board (LTFRB), Land Transportation Office (LTO) kag Iloilo City Traffic Management Unit (ICTMU), isa lang ka beses nga pahanugutan sila nga makasulod sa Iloilo City.
Ginpahayag sini nga ang patakaran ang makatuga lang sa ila sang kagutom, kapyerdehan, kag pagkaguba sang puturo sang ila nga mga kabataan.
Ginpakamalaut man sang natungdan ang indi patas nga pagpahanugot sa mga operators kag drivers nga makasulod kag indi makasulod sa syudad.
