Pasakaan sang kaso sang Iloilo City Traffic Management Unit (ICTMU) ang isa ka modernized jeepney driver matapos nga ginhaboy kag ginkumos ang Temporary Operators Permit nga gin-issue sang traffic enforcer sa no-loading area sang E. Lopez St., Jaro, Iloilo City.
Sa interview sang Bombo Radyo kay Louie Batislaong, traffic enforcer, iya ginpahayag nga desidido ang talatapan nga pasakaan sang kaso nga Disobedience to Lawful Order, Unjust Vexation kag Oral Defamation.
Suno kay Batislaong, ang kaso nagaangot man sa pagkomiter sang driver sang traffic violation bangud sa pag-pick up sang pasahero sa no-loading area sang E. Lopez St.
Gin-athag man sini nga indi lamang sa traffic enforcers nagpakita sang malain nga pamatasan ang driver bangud lakip man ang kapulisan.
Gintumod man sang enforcer nga apisar nga ginpunggan sang kapulisan ang driver, nagtuyo pa gid ini nga maglakat.
Ginakabig naman sang natungdan nga isa ka insulto para sa ila bahin ang nangin aktwasyon sang driver ilabi na nga nagapatuman lang man sila sang layi sang syudad.
Nagdepensa naman ang driver sang modernized jeep nga sang pagdakop sa iya sang traffic enforcer, gilayon man niya nga ginhatag ang driver’s license.
Suno kay alyas JR, wala naman siya nagbais pa sa enforcer matapos nga gin-surrender ang iya nga lisensya.
Gintumod man sini nga sang ginahimo-an na siya sang Temporary Operators Permit, may isa pagid nga modernized jeep ang nag-pick up sang pasahero, rason nga ginkwestyon sini kon ngaa wala ini gindakop sang traffic enforcer.
Ini man ang nangin rason nga ginkumos sini ang Temporary Operators Permit nga gin-issue sa iya.
Nagpanawagan man ang driver nga dapat mangin patas sila sa tanan nga mga matorista kag indi nga may pinilian.
