Wala nakabaton sang ano man nga report ang Iloilo City Traffic Management Unit (ICTMU) kaangot sa nagalapta nga video nga inaway sa tunga sang driver sang traditional jeepney kag driver sang modernized unit sa Jaro, Iloilo City.
Sa interview sang Bombo Radyo kay Retired Police Colonel Uldarico Garbanzos, Head sang Iloilo City Traffic Management Unit, iya ginpahayag nga ginaplanohan sang talatapan nga imbestigaran ang natabo nga isidente bangud kilala sang operation team ang isa sa mga driver.
Suno kay Garbanzos, posible nga nag-inaway ang duha ka driver bangud sa agaway sang pasahero kag sa loading kag unloading area.
Ginpahayag man sini nga santo sa report sang Jaro Police Station, wala man sila sang may nabaton nga report may kaangtanay sa paglasanay sang duha ka driver dala ang ila tagsa ka armas nga kutsilyo kag tubo.
Ginalantaw man sang talatapan nga dugangan ang loading kag unloading areas sa syudad agud nga indi na magliwat pa ang amo nga insidente.
Padayon naman ang training sang talatapan sa mga drivers sang traditional kag modernized jeepneys lakip man ang sa bahin sang mga tricycle.
