Nagpahanumdom ang Iloilo City Traffic and Transportation Management Office ukon ICTTMO nga indi dapat pag-himuon nga extension sang garahe ang dalan.
Suno kay Cyril Octavio, Chief of Operations sang Public Order and Safety Management Office (POSMO), isa sa mga nagapanguna nga concern sang mga barangay officials sa meeting nga ginpatigayon sang ICTTMO amo ang liwat-liwat nga problema sang on-road parking.
May mga kaso man, suno kay Octavio, nga ang mga residente nga wala sang garahe nagabakal gihapon sang salakyan, gani sa dalan ini ginapark.
May yara man sang mga residente nga may garahe apang wala ini ginagamit, rason nga sa dalan gihapon ginaparking ang ila mga salakyan.
Bangod sini, nagpatigayon ang ICTTMO sang inventory sa tagsa ka barangay agud mahibaluan ang kadamuon sang mga salakyan nga kinahanglan sang parking space kag ang available nga lugar nga mahimo magamit bilang parking area.
Nadiskusyunan man ang posibilidad nga gamiton ang mga gym kag iban pa nga common areas sang barangay bilang parking area.
Apang, kinahanglan anay mahibaluan ang aktuwal nga kadamuon sang mga salakyan kag parking requirement sang tagsa ka lugar.
Ginpahayag ni Octavio nga importante ang inventory agud ma-identify ang available nga parking spaces kag makahimo sang mas komprehensibo nga solusyon sa problema.
Gindugang ni Octavio nga dapat konsiderahon anay sang mga residente ang available nga parking space antes magbakal sang salakyan kag indi magsalig sa dalan bilang permanente nga parking area.
