Nagaplano ang Iloilo City Traffic and Transportation Management Office nga panamion pa gid ang Iloilo Sunset Boulevard para sa mas maayo nga dalagan sang trapiko kag para masiguro man ang kaluwasan sang mga nagabisita sa lugar.
Sa interview sang Bombo Radyo kay Retired Police Colonel Uldarico Garbanzos, Head sang opisina, iya ginpahayag nga isa sa mga plano nila amo ang paghimo sang mas maayo nga parking areas sa Sunset Boulevard agud malikawan ang pagpug-ok sang trapiko sa lugar ilabi na gid sa hapon kag gab-i, kun sa diin madamo ang nagabisita sa lugar.
Suno kay Garbanzos, may yara na sang proposal ang Department of Public Works and Highways kag sa palaabuton nga committee hearing, maga-justify ang iya opisina kaangot sa husto nga plano sa parking areas.
Ginpahayag man ni Garbanzos nga plano man nila ang paglapta-lapta sang mga ambulant vendors sa nagkalain-lain nga bahin sang viewing deck sa Sunset Boulevard.
Suno sa iya, ang mga vendor nga nagsulod sa lugar mahimo magamit sa mas husto nga mga area para malikawan ang mga paggutok sang dalan.
Dugang sang opisyal, ang mga plano nga ini nagahingyo sang kooperasyon sang mga Ilonggo kag nagapakita sang seryoso nga commitment sang opisina sa paghatag sang maayo nga serbisyo sa mga nagabisita sa Iloilo City.
