ILOILO CITY – Ginatipon pa sang otoridad ang mga ebidensya agud mahibalu-an ang identity sang suspek nga nagluthang-patay sa isa ka helper sa Brgy. Arguelles, Jaro, Iloilo City.
Sa interview sang Bombo Radyo kay Police Staff Sergeant Saturnino Dela Cruz, imbestigador sang Jaro Police Station, iya ginpahayag nga sa subong, isa-isa nga gina-check ang mga Closed Circuit Television Camera sa palibot sang crime scene.
Suno kay Dela Cruz, santo sa panaysayon sang kaupod sang biktima, isa lang ang gunman apang santo naman sa iban pa nga witness, may yara sang kaupod ang suspek.
Ginpahayag ni Dela Cruz nga sa subong, ginaproseso na ang autopsy examination sa bangkay sang biktima nga anay drug surrenderee.
Nahibalu-an nga sang Setyembre 26, dead on arrival sa hospital ang biktima nga si Michael Suarez, 39 anyos, pamilyado kag residente sang San Roque sa distrito sang Jaro.
Si Suarez ang nagatrabaho bilang helper sa pagbaligya sang pagkaon sa Jaro Plaza kag tuyo na nga magpauli sang natabo ang insidente.
