Ginpasidunggan ang walo ka tuig nga ido nga si Wheel nga amo ang nakabulig agud makit-an ang bangkay sang isa ka biktima sang pagtibusok sang eroplano sa kagulangan sa banwa sang San Mariano sa probinsya sang Isabela.
Suno sa trainers sang AK9 Mandog Sniffers Volunteers Organization, ang maabtik nga pagpanimaho ni Wheel ang may daku nga papel nga gilayon nga nasapwan sang otoridad ang lawas ni Erna Escalante, isa ka 43-anyos nga barangay health worker nga isa sa duha nga nakasakay sa nag-crash nga Piper plane nga RP-C1234.
Antes sini, una na nga nasapwan ang bangkay sang piloto nga si Capt. Levy Abul II.
Si Wheel naman ang kabahin sang tatlo ka scent-tracker dogs nga ginpadala agud pangitaon si Escalante nga una nga ginpinsar nga buhi bangud wala ini nakit-an kaupod sa nagkalawasak nga parte sang piper plane.
Domingo sang aga sang nakit-an ang biktima ginabanta 200 metros ang kalayuon halin sa nahamtangan sang parte sang eroplano.
Suno kay Red Oliva Lim, head sang AK9 Mandog Sniffer Volunteers, nakaluwas kuntani si Escalante sa pagtibusok sang eroplano apang ginbawian sang kabuhi bangud sa wala gilayon natatapan nga injuries, may gina-suprer na ini nga daan nga balatian, kag wala pa gilayon nakakaon.
Sa pihak nga bahin, sang nag-abot naman sa headquarters sang Tactical Operations Group 2 sang Philippine Air Force, gilayon nga ginpasidunggan si Wheel kag ang iya nga trainers.
Ginkilala man ang duha ka iban nga scent-tracker dogs nga pareho nga Belgian Malinois bangud sa ila bulig sa pagpangita.
Suno kay Lim, kilala si Wheel sa iya nga “great sense of smell” kag “superior tracking instincts” sa sulod na sang walo ka tuig nga training sini.
Nakabulig man ini anay sa search operation sang Pebrero sa Divilacan, Isabela plane crash kun sa diin patay ang piloto kag ang lima ka pasahero. #
