Ginhikayan ni Presidente Rodrigo Duterte ang mga senador nga pabor sa COVID-19 vaccine nga gindevelop sang Pfizer-BioNTech kasunod sang kamatayon sang masobra 20 ka mga tigulang sa Norway nga nakabaton sang nasambit nga bakuna.
Sa public address sang presidente, iya ginpamangkot ang mga senador kun luyag gid bala nila sang Pfizer bangud siya mismo ang ma-order sini.
Samtang ginlaslasan man sini ang mga kritiko sang Chinese firm nga Sinovac.
Pahayag sang presidente, ang nasambit nga bakuna ang gingamit na sa madamo nga pungsod kaangay sang United Arab Emirates, Turkey, Egypt, Thailand Malaysia kag Indonesia.
Gin-athag man ni Duterte nga antes pa man nagdevelop sang bakuna, nagtawag na ini kay Chinese President Xi Jinping agud nga makapangayo sang bulig kag indi pagkalimtan ang Pilipinas kun makahimo sang bakuna ang China batuk sa COVID-19.
Sa subong padayon pa nga nagapatigayon sang Phase III trials ang Sinovac sa ila nga bakuna kag sa Brazil, nakitaan lamang ini sang 50.4 percent nga ka-epektibo.
