ILOILO CITY – Yara na sa 90% ang pagpanghanda sang walo ka mga tribu para sa ila Dinagyang 2020 360-degree performance sa palaabuton nga Enero 26.
Sa interview sang Bombo Radyo kay Dinagyang Artistic Committee member kag Judging Committee Chair Elvert Bañares, iya ginpahayag nga 10 ka porsyento na lang ang kinahanglan agud ‘i-polish’ ang mga performance bangud halin pa sang nagligad nga tuig gin-umpisahan ang paghimo sang konsepto, pagplano sa costume, kag madamo pa.
“Kun sa bulak pa, nagapamukadkad na ang tagsa ka tribu,” pahayag ni Bañares.
Dugang pa sang natungdan, tuman ang pag-monitor sang Iloilo Festivals Foundation Inc. (IFFI) sa mga eskwelahan paagi sa mga artistic committee nga na-designar sa tagsa ka tribu, rason nga madasig nga na-coordinate ang mga dapat pa pauswagon.
“Subong nga Opening Salvo, kun kakson mo ang mga ngalan sang mga tribu, indi mo na mabal-an kun sin-o ang naga-perform, kay wala sang law-law. Tanan sila manami,” suno kay Bañares.
Iya man ginpahayag nga talalupangdon ang pagdamo sang mga tumalan-aw sa tagsa ka practice sang mga tribu, kag ini bangud makit-an na sang publiko ang tanan nga anggulo sang performance nga ginapatigayon.
“Syempre, ang tawo ya, kun may makita sila, matinir gid na sila, kun wala te mapuli sila,” suno kay Bañares.
Nahibaluan nga walo ka mga tribu ang maga-compete sa Enero 26, Domingo: Tribu Barriohanon sang Bo. Obrero National High School; Tribu Binhi sang Melchor L. Nava National High School; Tribu Dagatnon sang Ramon Avanceña Memorial National High School; Tribu Hugponganon sang Tiu Cho Teg-Ana Ros Foundation Integrated School; Tribu Ilonganon sang Jalandoni National High School; Tribu Paghidaet sang La Paz National High School; Tribu Panayanon sang Iloilo City National High School; kag Tribu Salognon sang Jaro National High School.
