ILOILO CITY – Ginsapol sang Iloilo Festivals Foundation Inc. ang mga katapo sang media sa katuyu-an nga mas mapaayo kag mapasangkad ang pagpatigayon sang Dinagyang Festival 2020.
Ginpangunahan ni Dr. Rogelio Florete Sr., chairman sang Florete Group of Companies kag nagaserbe man nga chairman sang Media and Publicity Committee, ang nasambit nga pagsinapol.
Suno kay Dr. Florete, ginakilala gid niya ang daku nga papel sang media sa pagtib-ong sang Dinagyang Festival 2020.
Ginpahayag ni Dr. Florete nga handum sang Iloilo Festivals Foundation Inc. nga mag “level-up” ang pagpatigayon sang nasambit nga kahiwatan.
Kabahin sa mga nagtambong sa pagsinapol amo ang nagabug-os sa mainstream media kasubong sang print, television, radio lakip na ang mga vlogger, photographers kag iban pa.
Katuyu-an sang pagsinapol amo nga ipaidalom sa briefing ang mga katapo sang media agud nga mangin matalunsay ang pagpatigayon sang coverage sa tion sang Dinagyang Festival 2020.
Nahibalu-an nga ini ang labing una nga tion nga ang Iloilo Festivals Foundation Inc. amo ang magadumala sa Dinagyang Festival kasunod sang pagdula sang Iloilo Dinagyang Foundation Inc.
