Nagalaum ang business sector nga matapna sang masunod nga administrasyon ang madata nga smuggling sang agricultural products sa Pilipinas nga direkta nga nagaapekto sa local farmers.
Sa interview sang Bombo Radyo kay Engineer Terence Uygongco, spokesperson sang business organization nga Iloilo Economic Development Foundation Inc. (ILEDF), iya ginpahayag nga may naga-eksister na nga layi agud ma-address ini nga problema apang kinahanglan nga pabaskugon ang enforcement.
Suno kay Uygongco, dapat nga mas mangin vigilante ang government agencies sa pag-check sang mga produkto nga naga-guwa sulod sa pungsod.
Ginpaathag sini nga labi ini nga kinahanglanon sang mga mangunguma bangud mahal na nga daan ang presyo sang ila mga binhi kag ginagamit nga abono kag nagakadapat lang nga baklon man ang produkto sa husto nga presyo.
Ang Department of Justice (DOJ) ang una na nagpasalig nga gina-imbestigaran na ang ginapahayag smuggling sang agricultural products lakip na ang alleged misdeclaration sang goods kag undervaluation.
Ang ARTA ukon Anti-Red Tape Authority ang nagabulig man sa pag-imbestigar sa government kag private sectors nga gin-alegar may partisipasyon man sa agricultural smuggling activities.
May yara man sang separado nga imbestigasyon batok sa ginapahayag iligal nga pagpasulod sang palm oil sa Pilipinas. May mga opisyal pa sang Department of Agriculture (DA) nga ginapahayag lakip sa mga kahimbon sang smugglers.
Sa bahin ni presumptive president Bongbong Marcos, ginabulubantayan pa subong kun sin-o ang potential nominees ukon ang pinal nga iga-appoint nga magapamuno sa crucial agencies sa pagtapna sa sini nga problema — ang DA kag ang Bureau of Customs. ##
