ILOILO CITY – Bentaha para sa isa ka public official nga may yara sang ihibalo natuhoy sa public administration apang ang padayon man nga pagtu-on ang makabulig man sa serbisyo publiko.
Ini ang ginpahayag sang nagapanguna nga city councilor sang syudad sang Iloilo sa nagtapos nga eleksyon.
Sa interview sang Bombo Radyo kay Atty. Sedfrey Cabaluna, anay media man kag government employee, iya ginpahayag nga mas maayo nga antes pa man magpungko ang isa ka public official, dapat nga may yara na siya sang ihibalo sa pagpang-gobyerno agud nga indi man mauyang ang tyempo kag gilayon nga makabulig sa publiko.
Suno kay Cabaluna, apisar nga isa na siya ka abogado, amat-amat na niya nga balikan ang layi ilabi na sa pagpang-gobyerno kag paghimo sang layi ukon ordinansa.
Samtang, sa tion nga pormal na ini nga magpungko bilang konsehal sang syudad, maga-konsulta siya sa nagkalain-lain nga sektor agud nga makadihon sang ordinansa.
Importante man suno sa iya nga nagapalab-ot sang concern ang mga pumuluyo agud nga mahibaluan niya kun ano nga ordinansa ang iya dapat nga idihon.
Ang ordinansa nga gusto niya nga idihon una amo ang pag-convert sang Iloilo City Urban Poor Affairs Office (ICUPAO) sa isa ka departamento agud nga mas madamo pa nga resources ang mahimo nga magamit agud nga ma-adress ang problema sa urban poor.
Tutukan man niya ang pagpasanyog sang turismo sang syudad.
Bilang anay chief operating officer sang Department of Tourism (DOT) – VI, siya ang nagpamuno sa pagdihon sang Tourism Development Plan sang tanan nga syudad kag probinsya sa rehiyon.
Importante suno kay Cabaluna nga balikan ang plano kag chekyaron kun bala na-implementar ang amo nga plano.
Maga-coordinate man siya sa tourism offices sa kaipi nga lugar sang syudad.
Magluwas sa urban poor kag turismo, tutukan man niya ang pagdihon sang mga programa para sa mga kabataan.
Ang komitiba may kaangtanan sa urban poor kag turismo ang gusto nga makuha ni Cabaluna apang bukas man siya sa mangin desisyon sang mayoriya sa konseho.
Nagpasalig naman si Cabaluna sa publiko nga tungdan niya ang iya responsibilidad kag hingalitan ang tatlo ka tuig nga ginpahulam sa iya agud nga mahatag ang nagaka-igo nga serbisyo sa mga Ilonggo.
Nagpangayo man ini sang bulig sa pumuluyo nga amo ang mas nakahibalo sang ila problema kag subong man sa nagkalain-lain nga sektor nga amo ang makabig nga eksperto.
Si Cabaluna ang nakakuha sang 144,328 votes nga amo ang nagapanguna sa councilor race.
Antes ang iya kadalag-an subong nga tuig, napaslawan ini nga magdaog sang nagligad nga 2016 sa amo man nga posisyon bilang independent.
Ginakabig niya nga dako nga bulig ang iya partido sa iya kadalag-an.
