STA. BARBARA, ILOILO – Nalakip sa indigenous case ang ika-15 nga casualty kun Coronavirus Disease 2019 (COVID-19) sa Western Visayas ang pagahambalan.
Sa interview sang Bombo Radyo kay Dr. Ma. Sophia Pulmones, pinuno sang Local Health Support Division sang Department of Health Region 6, iya ginpahayag nga wala sang travel history sa luwas sang Western Visayas si Patient no. 336 – 52 anyos nga lalaki sang Sta. Barbara, Iloilo.
Suno kay Pulmones, Hunyo 18 sang nakitaan sang sintomas sang COVID-19 ang pasyente, Hunyo 25 gin-admit sa hospital, Hulyo 1 sang nakumpirma nga nagpositibo sa virus kag ginbawi-an sang kabuhi sang Hulyo 19.
Ginpahayag ni Pulmones nga may yara na nga daan sang high blood pressure kag diabetes ang pasyente nga nakapalala sang iya medical condition nga nagresulta sa komplikasyon.
Sa subong, ginpahayag sang natungdan nga ginahibalo pa ang tuhoy sa contact tracing nga ginapatigayon sang Local Government Unit sang Sta. Barbara.
Ang masubo nga balita ang ginkumpirma naman ni Mayor Rema Somo paagi sa iya Facebook Account.
Samtang, indi naman makumpirma ni Pulmones kun bala matuod ang report nga may yara sang isa ka Overseas Filipino Worker nga na-intercept sa airport kag nagpositibo sa COVID-19.
Sa pagpaathag ni Pulmones, wala pa sang kumpirmasyon gikan sa pamunu-an sang QualiMed Hospital Molecular Laboratory kun bala matuod ang tuhoy diri.
