ILOILO CITY – Nanari-sari nga aktibidad ang ginapatigayon sang Philippine National Police kadungan sang pagsaulog sang Police Community Relations Month subong nga Hulyo.
Sa interview sang Bombo Radyo kay Police Captain Shella Mae Sangrines, tagpamaba sang Iloilo City Police Office, iya ginpahayag nga subong nga 2019, ginasaulog sang Philippine National Police ang ika-24 nga anibersaryo sang Police Community Relations nga may tema nga ‘Sambayanan, Mahalagang Kaakibat ng Kapulisan sa Pagtaguyod ng Mapayapa at Maunlad na Bayan’.
Katuyu-an sini suno kay Sangrines amo nga ipahibalo nga ang mga pulis ang indi lamang tagpangapin sang pungsod kag nagapangdakop sang mga kriminal kundi nagaserbe man nga abyan sang publiko.
Sa pagkabug-usan, ginpahayag ni Sangrines nga may yara sang ginpatigayon nga blood letting activity sa diin masobra sa 100 ka successful blood donors ang nakuhaan sang dugo nga ila naman nga gindonar sa Philippine Red Cross.
Diri sa syudad sang Iloilo, ginpahayag sang natungdan nga may yara sang nanari-sari nga aktibidad ang ginapatigayon sa tagsa ka police station may kaangtanan sa Police Community Relations Month.
