Nagapabilin nga matalunsay ang dalagan sang filing sang certificate of candidacy (COC) sang mga political aspirant sa probinsya sang Iloilo sa ika-pito sini nga adlaw.
Ini ang kasunod man sa monitoring nga ginpaguwa sang Iloilo Police Provincial Office (IPPO).
Sa interview sang Bombo Radyo kay Police Colonel Bayani Razalan, Director sang Iloilo Police Provincial Office, iya ginpahayag nga malinong kag nagapabilin nga matawhay ang sitwasyon sa pila ka mga venues sang Commission on Elections (COMELEC).
Nagalaum man ini nga tubtob buwas nga adlaw sang Martes, ang pinakauli nga adlaw sang filing, nga mangin madinalag-on ang amo nga aktibidad.
Suno kay Razalan, wala man sang matumod subong nga “intense” political rivalry sa probinsya.
Gin-athag man sini nga sa paglibot sang talatapan sa tagsa ka mga munisipyo, tayuyon ang filing sang candidacy kag wala pa sang na-record nga mga areas of concern nahanungod sa eleksyon.
Liwat man ginpanindugan sang IPPO nga indi makabig nga “intense” political rivalry ang natabo nga pagbinaisay nanda San Joaquin Mayor Ninfa Garin kag Vice Mayor Marvigrace “Taba” Getuya.
