Sa tagsa ka pahina sang sulat nga iya ginabasa, wala naglaum si Tita Regine sang Kahapon Lamang Program sang Bombo Radyo nga ini ang magabukas sa makahulogan nga istorya sang iya nga kabuhi.
Sa pagpakigbahin sini sang iya nga inagyan bilang isa ka host, ginlaragway sini nga ‘shocked kag ginkulbaan’ siya sang gintumod nga siya ang mabulos kay Tiyay Evelyn nga anay host sang Kahapon Lamang Program sang DYFM Bombo Radyo Iloilo.
Suno kay Tita Regine, wala siya naglaum nga siya ang magatal-os sa iconic nga si Tita Evelyn, nga napamatin-an sang tanan sa patag sang kasulatan sang kasaysayan sang tagsa ka letter sender.
Sa pahayag ni Tita Regine, wala siya makapati nga siya ang may abilidad sa pagbasa sang istorya sang mga indibidwal.
Sa amat-amat nga pagtinguha kag pagtuon, natun-an niya nga palanggaon ang Kahapon Lamang Program.
Paagi sa mga sulat nga iya ginabasa, nareyalisar sini nga may mga tawo sa kalibutan nga mas madalom pa ang ginaagyan sa pagpangabuhi.
Nangin palaagyan man ang programa agud nga mapakilala niya si Jesus sa mga tumuluo kag sa kutob nga malab-otan sang programa sa kahanginan.
Ang mga problema nga iya nabasa ang nagtulod sa iya nga magpalapit kay Jesus agud nga makapangayo siya sang kaalam nga makalaygay sa mga indibidwal nga nagakinahanglan sang pulong ni Jesus.
Tuig 2012, sang nag-intra siy, lakip na ang iya pamilya sa Sta. Maria Prayer Community, ini ang naghatag sa iya sang kahulogan nga mas makabulig sa isigkapareho kadungan sang pagpalapit kay Jesus Kristo.
Kadungan sini, ang mga encounter kag teachings sa komunidad ang naghatag kay Tita Regine sang dugang nga rason agud nga magpadayon sang iya nga misyon, ang magbasa kag magpasalig nga may paglaum sa likod sang tagsa ka istorya.
